ജീവിതമെന്തെന്ന് ചിന്തിച്ചിട്ടുണ്ടോ മണ്ടാ..

മൂന്ന് മാസം മുമ്പാണ്
ഞാന്‍ ചത്തതെന്ന്
എഴുതിവച്ചിരിക്കുന്നത്
നീ കണ്ടതല്ലേ മണ്ടാ...?

പക്ഷിപനിയാണ്
ഇറച്ചീം മുട്ടേം
ഇറക്കുമതി നിരോധിച്ചെന്ന്
പത്രതലക്കെട്ട്
നീ കണ്ടതല്ലേ മണ്ടാ...?

ഒറ്റക്കാണ്...
തിന്നുതീര്‍ക്കാന്‍
നാലുദിനമെങ്കിലും വേണം
സ്റ്റൌവില്‍ നിന്ന് ഫ്രിഡ്ജിലേക്ക്
ഫ്രിഡ്ജില്‍നിന്ന് സ്റ്റൌവിലേക്ക്...
നീ ചെയ്യുന്നതെന്തെന്ന്
നീ അറിയുന്നില്ലേ മണ്ടാ...?

മൂന്നോനാലോ കൊല്ലത്തിലൊരിക്കല്‍
രണ്ടോ മൂന്നോ മാസം
വീട്ടുകാരനാകുമ്പോഴെങ്കിലും
ജീവിതമെന്തെന്നൊരിക്കലെങ്കിലും
നീ ചിന്തിച്ചിട്ടുണ്ടോ മണ്ടാ...?

ഗ്ലഗ്ല്‌ഗ്ലഗ്ല്‌ഗ്ലയെന്ന്
ഫ്രീസുചെയ്ത കോഴി
കറിപാത്രത്തിലെ തിളക്കൊപ്പം
പിന്നെയുമോരോന്ന്
വിളിച്ചുകൂവിക്കൊണ്ടേയിരുന്നു.