നഗരത്തിലെ പാതകള്‍

നഗരത്തിലെ യാത്രകളില്‍
തെക്കും വടക്കുമില്ല
കിഴക്കും പടിഞ്ഞാറുമില്ല
ലെഫ്റ്റും റൈറ്റും മാത്രം

റൈറ്റിന്
‘നേരായത്’ എന്ന് അര്‍ത്ഥം പറഞ്ഞ്
വലത്തേ വഴികളിലൂടെ മാത്രം
പൊയ്ക്കൊണ്ടേയിരുന്നാല്‍
ഓടയിലെ മാലിന്യങ്ങളൊക്കെ
ചെന്നടിയുന്നൊരു
അരക്ഷിത മേഖലയിലെത്തിപ്പെട്ടേക്കാം.

ഇടത്തേ വഴിയിലുമുണ്ട് ചുഴികള്‍
കൃത്യമായ മാര്‍ഗ്ഗരേഖ കൂടാതെ
തുടര്‍ച്ചയായി
മൂന്നോ നാലോ തവണ
ഇടത്തോട്ടുമാത്രം തിരിഞ്ഞുപോയാല്‍
ഒരു പക്ഷേ
തുടങ്ങിയേടത്തു തന്നെയോ
അതിനും പിറകിലോ
ചെന്നെത്തിയേക്കാം

നഗരത്തിലെ വഴികള്‍ ചിലപ്പോള്‍
പാമ്പും കോണിയും കളിക്കുന്ന
ചതുരപ്പലകയെ ഓര്‍മ്മിപ്പിക്കും

തിരിച്ചുപോരുമ്പോഴാണ്
എല്ലാം കീഴ്മേല്‍ മറിയുക
ഇടത്തുണ്ടായിരുന്നതൊക്കെ
വലത്തും
വലത്തുണ്ടായിരുന്നതൊകെ
ഇടത്തുമാകും.
നമ്മളാണ്
ദിശമാറിയതെന്ന്
ചിന്തിക്കയേ അരുത്
മാറിയത് അവയാണെന്നങ്ങ്
തറപ്പിച്ചു പറഞ്ഞേക്കണം
ആവര്‍ത്തിച്ചു പറഞ്ഞാല്‍
ഏതു നുണയാണ് നേരാകാതിരിക്കുക.

വീഴ്ച

ആകാശം
ഇന്നലേയും വിളിച്ചു
ഒരു സ്വപ്നത്തിലേക്കെന്ന പോലെ
നിനക്കെന്നിലേക്കു വീഴാം
പൊട്ടില്ല, പൊടിയില്ല,
ചത്തു പോകത്തുമില്ല

എന്നിട്ടും
പേടിയാണെനിക്ക്
വീഴ്ചയെക്കുറിച്ചുള്ള
തോന്നലുകള്‍
അത്ര ആഴത്തിലായതാലാകാം.

നുണ

ഞാനൊരിക്കലും നുണയെ
നേരില്‍ കണ്ടിട്ടില്ല

വെളുത്ത ഉടുപ്പിനകത്ത്
കല്ലുവെച്ച സത്യങ്ങള്‍
മരിക്കാന്‍ കിടക്കുന്നത്
എന്റെ ഉറക്കറയിലെ
ഇരുപത്തിരണ്ടിഞ്ചിന്റെ
ചൂടാറാപ്പെട്ടിയില്‍
തണുത്തുവിറങ്ങലിക്കുന്ന
കാഴ്ചയായി
വീതിച്ചു നല്‍കിയിട്ടുണ്ട്
വിരുന്നുകാര്‍ക്ക്

കഴിഞ്ഞ ദിവസം
പതിനൊന്നു സ്വപ്നങ്ങളാണ്
ഒന്നിച്ചുവിറ്റത്
ചോരി ബസാറില്‍

മൂന്നാമത്തെ പെഗ്ഗില്‍
ആരോ വരാനുണ്ടെന്ന്
കാത്തിരുന്നത്
നാലാമത്തെ പെഗ്ഗിനുള്ള
തയ്യാറെടുപ്പാണെന്ന്
ആര്‍ക്കാണറിയാത്തത്

ഇരുട്ടുപെയ്ത മഴയില്‍
ആകാശം
കുത്തിയൊലിച്ചുപോയത്
വിവരിച്ചും വിശകലനം ചെയ്തും
ഞങ്ങളാഘോഷിച്ചത്
മരണത്തെപെറ്റതിന്
തൂങ്ങിചത്ത
തെരുവുപെണ്ണിന്റെ
ഗര്‍ഭത്തിലിരുന്നായിരുന്നു;
…ചിയേഴ്സ്!

Related Posts with Thumbnails

പിന്തുടരുന്നവര്‍

  © Blogger template Noblarum by Ourblogtemplates.com 2009

Back to TOP